Opinion

നവംബര്‍ എട്ട്: സമ്പദ് വ്യവസ്ഥയുടെ ചരമദിനം – വിഷ്ണു. ജെ

നരേന്ദ്ര മോദിയുടെ നേതൃത്വത്തിലുള്ള ബി.ജെ.പി സര്‍ക്കാരിന്റെ ഏറ്റവും വലിയ സാമ്പത്തിക മണ്ടത്തമായിരുന്നു 500,1000 രൂപയുടെ നോട്ടുകള്‍ പിന്‍വലിക്കാനുള്ള തീരുമാനം. അഴിമതിക്കും കള്ളപ്പണത്തിനും എതിരെ പോരാട്ടം നടത്തുമെന്ന് കൊട്ടിഘോഷിച്ചായിരുന്നു 2014ല്‍ മോദി സര്‍ക്കാര്‍ അധികാരത്തിലെത്തിയത്. എന്നാല്‍, അധികാരത്തിലെത്തി രണ്ടുവര്‍ഷം കഴിഞ്ഞിട്ടും ഇതിനുള്ള ഒരു നടപടിയും സ്വീകരിച്ചില്ലെന്ന് മാത്രമല്ല കോര്‍പ്പറേറ്റുകള്‍ക്കും ഇഷ്ടക്കാര്‍ക്കും മോദി ഇളവുകള്‍ വാരിക്കോരി നല്‍കുകയും ചെയ്തു. ഇതോടെ പ്രതിപക്ഷത്തുനിന്ന് കടുത്ത വിമര്‍ശനങ്ങള്‍ ഉയര്‍ന്നു. ഈ ആരോപണങ്ങളെ പ്രതിരോധിക്കാന്‍ വേണ്ടി മാത്രമുള്ള പരിഷ്‌കാരമായിരുന്നു നോട്ടുനിരോധനം. തീരുമാനത്തിലൂടെ കള്ളപ്പണത്തിനെതിരെ ശക്തമായ നടപടിയെടുത്തുവെന്ന് അവകാശപ്പെടാം എന്നായിരുന്നു മോദി കണക്ക് കൂട്ടിയത്.

എന്നാല്‍, ആദ്യ ദിവസങ്ങളില്‍ തന്നെ സര്‍ക്കാരിന്റെ പദ്ധതി തകിടം മറിഞ്ഞുവെന്ന് വ്യക്തമായി. നോട്ടുനിരോധനം മൂലം കടുത്ത കറന്‍സി ക്ഷാമം രാജ്യം അനുഭവിച്ചു. ജനങ്ങള്‍ നോട്ടിനായി നെട്ടോട്ടമോടി. പലരും കറന്‍സി മാറ്റിയെടുക്കാനുള്ള ക്യുവില്‍ നിന്ന് മരിച്ചു. അപ്പോഴും 50 ദിവസത്തിനുള്ളില്‍ എല്ലാം ശരിയാവുമെന്നായിരുന്നു മോദി അവകാശപ്പെട്ടത്. പ്രശ്‌നങ്ങള്‍ എന്നിട്ടും ശരിയായില്ലെങ്കില്‍ തന്നെ ജീവനോടെ കത്തിക്കാമെന്നും പ്രധാനമന്ത്രി പറഞ്ഞു. പക്ഷേ, 50 ദിവസവും കഴിഞ്ഞ് മൂന്ന് വര്‍ഷമാവുമ്പോഴും നോട്ടുനിരോധനം സൃഷ്ടിച്ച ആഘാതത്തില്‍ നിന്ന് സമ്പദ്‌വ്യവസ്ഥ മോചിതമായിട്ടില്ല.

നോട്ടുനിരോധനം രാജ്യത്തെ സാമ്പത്തിക രംഗത്ത് വന്‍ പ്രത്യാഘാതങ്ങളാണ് ഉണ്ടാക്കിയത്. 2016ല്‍ 8.8 ശതമാനമുണ്ടായിരുന്ന ജി.ഡി.പി വളര്‍ച്ചാ നിരക്ക് 2019ല്‍ എത്തുേമ്പാള്‍ 5 ശതമാനത്തിലേക്ക് ചുരുങ്ങി. ജി.ഡി.പി നിരക്കിലെ കുറവിനുള്ള പ്രധാന കാരണങ്ങളിലൊന്ന് നോട്ട് നിരോധനമായിരുന്നു. ഇന്ത്യയുടെ ധനകമ്മി രണ്ട് ലക്ഷം കോടിയായി ഉയരുന്നതിനും തീരുമാനം കാരണമായി. 2014ല്‍ 5.6 ശതമാനമുണ്ടായിരുന്ന വ്യവസായിക ഉല്‍പാദനം -1.1ലേക്ക് ചുരുങ്ങി. ഇങ്ങനെ സമ്പദ്‌വ്യവസ്ഥയുടെ സര്‍വമേഖലയിലും നോട്ടുനിരോധനം ചലനങ്ങള്‍ സൃഷ്ടിച്ചു.

തൊഴിലുകള്‍ ഇല്ലാതാക്കി
ലേബര്‍ ബ്യൂറോയുടെ കണക്കുകള്‍ പ്രകാരം നോട്ടുനിരോധനം നടപ്പില്‍ വന്ന വര്‍ഷമായ 2016-17ല്‍ തൊഴിലില്ലായ്മ നിരക്ക് നാല് വര്‍ഷത്തിനിടയിലെ ഉയര്‍ന്ന നിരക്കിലേക്ക് എത്തി. 2017-18 വര്‍ഷത്തില്‍ 45 വര്‍ഷത്തിനിടയിലെ ഉയര്‍ന്ന നിരക്കായ 6.1 ശതമാനത്തിലേ്കകും തൊഴിലില്ലായ്മ എത്തി. ദേശീയ സാമ്പത്തിക പ്രവര്‍ത്തനങ്ങളില്‍ രണ്ടുമുതല്‍ മൂന്ന് ശതമാനത്തിന്റെ വരെ തൊഴില്‍ നഷ്ടമുണ്ടായി. 2016 മുതല്‍ 2018 വരെ അഞ്ച് മില്യണ്‍ ആളുകള്‍ക്കാണ് ഇന്ത്യയില്‍ തൊഴില്‍ നഷ്ടമുണ്ടായത്. 2016 സെപ്റ്റംബര്‍ മുതല്‍ ഡിസംബര്‍ വരെയുള്ള കാലയളവിലാണ് വലിയ രീതിയിലുള്ള തൊഴില്‍ നഷ്ടമുണ്ടായതെന്നും കണക്കുകളില്‍ നിന്ന് വ്യക്തമാകും. അസംഘടിത മേഖലയിലെ വരുമാനത്തില്‍ 32 ശതമാനത്തിന്റെ കുറവാണ് നോട്ടുനിരോധനം മൂലമുണ്ടായത്. ഗ്രാമീണ മേഖലയുടെ വരുമാനത്തില്‍ 33 ശതമാനത്തിന്റേയും കുറവുണ്ടായി.

തകര്‍ന്നടിഞ്ഞ് സാമ്പത്തിക വളര്‍ച്ച
നോട്ടുനിരോധനത്തെ തുടര്‍ന്ന് ഇന്ത്യയുടെ ജി.ഡി.പി വളര്‍ച്ചാ നിരക്ക് 2017 സാമ്പത്തിക വര്‍ഷത്തില്‍ 8.2 ശതമാനമായി കുറഞ്ഞു. തുടര്‍ന്നുള്ള രണ്ട് വര്‍ഷങ്ങളില്‍ യഥാക്രമം 7.2 ശതമാനവും 6.8 ശതമാനവുമായിരുന്നു സാമ്പത്തിക വളര്‍ച്ച. സാമ്പത്തിക വര്‍ഷത്തിന്റെ ചില പാദങ്ങളില്‍ വളര്‍ച്ചാ നിരക്ക് 6 ശതമാനത്തിനും താഴെ പോകുന്നതിനും നോട്ടുനിരോധനം കാരണമായി. 2020ല്‍ ജി.ഡി.പി വളര്‍ച്ചാ നിരക്ക് ആറ് ശതമാനമായി ചുരുങ്ങുമെന്നാണ് പ്രവചനം. ചെറുകിട-ഇടത്തരം വ്യവസായ മേഖലകളിലെ തകര്‍ച്ച സമ്പദ്‌വ്യവസ്ഥയെ പ്രതികൂലമായി ബാധിച്ചു. കറന്‍സി പിന്‍വലിക്കല്‍ മൂലം ഇത്തരം വ്യവസായ സ്ഥാപനങ്ങളിലെ ഇടപാടുകള്‍ കുറഞ്ഞു. മേഖലയില്‍ വലിയ രീതിയിലുള്ള തൊഴില്‍ നഷ്ടവും സൃഷ്ടിച്ചു.

ധനകമ്മി ഉയരുന്നു
2013-14 സാമ്പത്തിക വര്‍ഷത്തില്‍ ഇന്ത്യയുടെ ധനകമ്മി 5,02,858 കോടിയായിയിരുന്നു. എന്നാല്‍, തുടര്‍ന്നുള്ള വര്‍ഷങ്ങളില്‍ അത് ഉയരുകയായിരുന്നു. 2016ലെ നോട്ടുനിരോധനം കൂടിയെത്തിയതോടെ നിയന്ത്രണാതീതമായ രീതിയിലേക്ക് ധനകമ്മി ഉയരുകയാണ്. 2019-20 സാമ്പത്തിക വര്‍ഷത്തില്‍ ഏഴ് ലക്ഷം കോടിയായി ധനകമ്മി ഉയരുമെന്നാണ് പ്രവചനങ്ങള്‍. ഫിച്ചിന്റെ (ഫെഡറേന്‍ ഓഫ് ഇന്ത്യന്‍ ചേമ്പേഴ്‌സ് ഓഫ് കൊമേഴ്‌സ് ആന്‍ഡ് ഇന്‍ഡസ്ട്രീസ്) പഠനമനുസരിച്ച് ആകെ ജി.ഡി.പിയുടെ 3.6 ശതമാനമായി ധനകമ്മി ഉയരും. സാമ്പത്തികരംഗത്ത് നോട്ടുനിരോധനം മാന്ദ്യത്തിന്റേതായ സാഹചര്യം സൃഷ്ടിച്ചതോടെ നികുതി പിരവില്‍ പ്രതീക്ഷിച്ച നേട്ടമുണ്ടാക്കാന്‍ സാധിച്ചില്ല. രാജ്യത്തെ എല്ലാ മേഖലയും പ്രതിസന്ധിയിലായതോടെ കേന്ദ്രസര്‍ക്കാരിന്റെ വരുമാനത്തില്‍ കുറവ് രേഖപ്പെടുത്തുകയാണ്. കോര്‍പ്പറേറ്റ് നികുതിയിലെ ഇളവ് സ്ഥിതി രൂക്ഷമാക്കുമെന്ന ആശങ്കയും ഉയര്‍ന്നിട്ടുണ്ട്.

ഡിജിറ്റല്‍ ഇടപാടുകളില്‍ വര്‍ധനയില്ല
നോട്ടുനിരോധനത്തിന്റെ ആദ്യഘട്ടത്തില്‍ കളളപണം പിടിക്കലായിരുന്നു നരേന്ദ്രമോദി സര്‍ക്കാറിന്റെ പ്രഖ്യാപിത ലക്ഷ്യം. എന്നാല്‍, അത് നടക്കില്ലെന്ന് ഉറപ്പായതോടെ ഡിജിറ്റല്‍ ഇടപാടുകള്‍ പ്രോല്‍സാഹിപ്പിക്കാനാണ് നോട്ടുനിരോധിച്ചതെന്ന് അറിയിച്ച് തലയൂരനായിരുന്നു സര്‍ക്കാര്‍ ശ്രമം. നോട്ടുനിരോധനം കഴിഞ്ഞ് മൂന്നുവര്‍ഷം പൂര്‍ത്തിയാകുമ്പോള്‍ ഡിജിറ്റല്‍ ഇടപാടുകളില്‍ കാര്യമായ വര്‍ധനയുണ്ടായിട്ടില്ല. 2019 സെപ്തംബറിലെ ആര്‍.ബി.ഐ കണക്കുകള്‍ പ്രകാരം 20.49 ലക്ഷം കോടിയുടെ പണമാണ് ആളുകളുടെ കൈവശം കറന്‍സിയായി ഉള്ളത്. 2018 സെപ്റ്റംബറുമായി താരതമ്യം ചെയ്യുമ്പോള്‍ 13.3 ശതമാനം വര്‍ധനയാണ് കറന്‍സിയുടെ കാര്യത്തില്‍ ഉണ്ടായിരിക്കുന്നത്. റിയല്‍ എസ്റ്റേറ്റ് സെക്ടറിയില്‍ ഇടപാടുകളില്‍ ഭൂരിപക്ഷവും കറന്‍സി ഉപയോഗിച്ച് നടത്താനാണ് താല്‍പര്യമെന്ന് മേഖലയില്‍ പ്രവര്‍ത്തിക്കുന്നവര്‍ അടുത്തിടെ നടന്ന സര്‍വേയില്‍ വ്യക്തമാക്കിയിരുന്നു. ഇതുകൂടി ചേര്‍ത്ത് വായിക്കുേമ്പാഴാണ് നോട്ടുനിരോധനമെന്ന തീരുമാനം എത്രത്തോളം പരാജയമാണെന്ന് വ്യക്തമാവുക.

കള്ളപ്പണവും തീവ്രവാദവും തടയാനായില്ല
നോട്ട് നിരോധനത്തിന്റെ പ്രധാനപ്പെട്ട മറ്റു രണ്ട് ലക്ഷ്യങ്ങളായിരുന്നു കള്ളപ്പണവും തീവ്രവാദവും തടയുക എന്നത്. പക്ഷേ, ഇക്കാര്യത്തില്‍ നോട്ടുനിരോധനം സമ്പൂര്‍ണ്ണ പരാജയമാണെന്ന് കണക്കുകളില്‍ നിന്ന് വ്യക്തമാകും. നോട്ടുനിരോധനത്തിന് ശേഷം വിവിധ അന്വേഷണ ഏജന്‍സികള്‍ നടത്തിയ റെയ്ഡില്‍ 500, 2000 രൂപയുടെ കറന്‍സിയുടെ കള്ളപണം വലിയ രീതിയില്‍ പിടിച്ചെടുത്തിരുന്നു. നോട്ടുനിരോധനത്തിന് ശേഷവും കള്ളപണം ഫലപ്രദമായി പ്രതിരോധിക്കുന്നതില്‍ സര്‍ക്കാര്‍ ദയനീയമായി പരാജയപ്പെട്ടു. കള്ളനോട്ടുകളുടെ എണ്ണത്തിലും കഴിഞ്ഞ വര്‍ഷങ്ങളുമായി താരതമ്യം ചെയ്യുമ്പോള്‍ വര്‍ധനയുണ്ടായിട്ടുണ്ട്. 500 രൂപയുടെ കള്ളനോട്ടുകളില്‍ 121 ശതമാനത്തിന്റേയും 2000 രൂപയുടെ കള്ളനോട്ടുകളില്‍ 21.9 ശതമാനത്തിന്റേതുമാണ് വര്‍ധനയെന്ന് ആര്‍.ബി.ഐയുടെ ഏറ്റവും പുതിയ റിപ്പോര്‍ട്ട് വ്യക്തമാക്കുന്നു. നോട്ടുനിരോധനം തീവ്രവാദത്തെ ഇല്ലാതാക്കുമെന്നായിരുന്നു സര്‍ക്കാരിന്റെ മറ്റൊരു അവകാശവാദം. എന്നാല്‍, തീവ്രവാദ പ്രവര്‍ത്തനങ്ങളില്‍ 2016ന് ശേഷം വര്‍ധനയുണ്ടായെന്ന് സൗത്ത് ഏഷ്യ ടെററിസം പോര്‍ട്ടലിന്റെ കണക്കനുസരിച്ച് 2015ല്‍ 728 പേരാണ് തീവ്രവാദവുമായി ബന്ധെപട്ട പ്രവര്‍ത്തനങ്ങള്‍ മൂലം കൊല്ലപ്പെട്ടത്. 2018ല്‍ എത്തി നില്‍ക്കുമ്പോള്‍ ഇത് 940 ആയി ഉയര്‍ന്നുവെന്നാണ് കണക്കുകളില്‍ നിന്ന് വ്യക്തമാകുന്നത്.

ഇന്ത്യന്‍ സമ്പദ്‌വ്യവസ്ഥ ഒരിക്കലും അഭിമുഖീകരിച്ചിട്ടില്ലാത്ത പ്രതിസന്ധിയാണ് നിലവില്‍ അഭിമുഖീകരിക്കുന്നത്. സ്വാതന്ത്ര്യാനന്തരം മുതലാളിത്ത നയത്തെയോ സോഷ്യലിസത്തെയോ പൂര്‍ണമായും ആശ്രയിക്കാതെ രണ്ടിന്റേയും ഗുണവശങ്ങള്‍ മാത്രമെടുത്തായിരുന്നു ഇന്ത്യ സാമ്പത്തികനയം രൂപീകരിച്ചത്. സ്വകാര്യമേഖലക്ക് പകരം പൊതുമേഖല സ്ഥാപനങ്ങളായിരുന്നു സമ്പദ്‌വ്യവസ്ഥയുടെ കരുത്ത്. 2008ല്‍ ആഗോള സാമ്പത്തിക മാന്ദ്യമുണ്ടപ്പോഴും ഉലയാതെ പിടിച്ചുനില്‍ക്കാന്‍ രാജ്യത്തെ സഹായിച്ചത് ഈ സാമ്പത്തിക നയമായിരുന്നു. എന്നാല്‍, അഞ്ചുവര്‍ഷത്തെ നരേന്ദ്രമോദി ഭരണം രാജ്യത്തെ സമ്പദ്‌വ്യവസ്ഥയെ മാറ്റി മറിച്ചിരിക്കുന്നു. മുമ്പെങ്ങുമില്ലാത്തവിധം സാമ്പത്തിക പ്രതിസന്ധിയുടെ കാര്‍മേഘങ്ങള്‍ രാജ്യത്തിന് മേലെ മൂടുകുകയാണ്.

രണ്ട് സാമ്പത്തിക പരിഷ്‌കാരങ്ങളാണ് ഇന്ത്യയെ പ്രതിസന്ധിയിലേക്ക് നയിച്ചത്. ജി.എസ്.ടിയും നോട്ടുനിരോധനവുമായിരുന്നു രാജ്യത്തിന്റെ അടിവേരറുത്തത്. മോദി സര്‍ക്കാര്‍ സാമ്പത്തികപരിഷ്‌കാരങ്ങള്‍ തുടക്കം കുറിച്ചത് ഈ രണ്ട് നയങ്ങളിലൂടെയുമായിരുന്നു. ഇത് പരാജയമായതോടെ രാജ്യത്ത് സാമ്പത്തിക പ്രതിസന്ധി ഉടലെടുത്തു. പിന്നീട് അത് പരിഹരിക്കാനായി ശ്രമം. അതിനായി നയങ്ങള്‍ പലതവണ മാറ്റിയെഴുതി. പക്ഷേ, സാധാരണക്കാരന്റെ ദുരിതങ്ങള്‍ക്ക് മാത്രം ഇനിയും അറുതിയായിട്ടില്ല. കോര്‍പ്പറേറ്റുകള്‍ രാജ്യത്ത് വന്‍ നേട്ടം സ്വന്തമാക്കുകയും ചെയ്യുന്നു. നരേന്ദ്രമോദിയുടെ നേതൃത്വത്തിലുള്ള സര്‍ക്കാര്‍ അധികാരത്തില്‍ നിന്ന് പുറത്തുപോയാല്‍ മാത്രമേ രാജ്യം നേരിടുന്ന കടുത്ത പ്രതിസന്ധി മറികടക്കാനാവു.

Back to top button

Notice: ob_end_flush(): failed to send buffer of zlib output compression (0) in /home/qreseller/janapaksham.in/wp-includes/functions.php on line 4757