ചരിത്രത്തിലും വർത്തമാനത്തിലും ആരാധനാലയങ്ങൾ അധികവും പടുത്തുയർത്തപ്പെട്ടത് മനുഷ്യരുടെ ദാനങ്ങളിലൂടെയാണ്. രാജാക്കന്മാരും ഭൂപ്രഭുക്കന്മാരും സാധാരണക്കാരും എല്ലാം വ്യത്യസ്ത കാലങ്ങളിൽ വിശ്വാസികൾക്ക് ആരാധന നിർവഹിക്കുവാനുള്ള ഭൂമിയും മറ്റു മുതലുകളും ദാനം ചെയ്തു പോന്നിട്ടുണ്ട്. മുസ്‌ലിം സമൂഹത്തെ സംബന്ധിച്ചിടത്തോളം ഇങ്ങനെ ദാനം സ്വീകരിക്കുന്നതിനും കൊടുക്കുന്നതിനും അത്തരം മുതലുകൾ നിലനിർത്താനുമുള്ള നിയമ ശാഖയാണ് 'വഖ്ഫ്' എന്ന് അറിയപ്പെടുന്നത്. ഇസ്‌ലാമിലെ എല്ലാ നിയമ സ്‌കൂളുകളും (മദ്ഹബ്) വഖ്ഫ് സ്വീകരിക്കുന്നതിനും സ...
